Sunday, May 10, 2009

و كأنك يابو زيد ماغزيت

طفلة عمرها عشر سنوات بإحدى القرى في الرياض تقدم لخطبتها شخص عمره 26 سنة والبنت وافقت وعند سؤال أبيها عن سبب الموافقة قالت البنية لأبوها أبيه يوديني البقالة اشترى حلاو و ككاو

تذكرت هالقصة و أنا اقرأ تعابير الناس وهم يقولون عن المرشح الفلاني ماقصر وياهم و تبرع لنادي الصليبحات

تذكرت هالقصة وانا أقرأ تعابير الناس وهم يقولون عن المرشح الفلاني ماقصر وياهم في بناء مستوصف المنطقه

تذكرت هالقصة وانا اقرأ تعابير الناس وهم يقولون عن المرشح الفلاني ماقصر وياهم و ساعدهم في موضوع العلاج بالخارج

تذكرت هالمواقف و مواقف أخرى و أن أقرأ و أستمتع بما يعمله مجموعه شباب مخلصه للوطن و هي تنادي بحملات وطنية متعدده و لكن لا حياة لمن تنادي




و بالمقابل هناك حملات تنادي باتجاه آخر و بعقلية واحد تعرفه احسن من عشرة ماتعرفهم





نعم آنا و غيري نشعر بالحزن لما يعيشه مجتمعنا من تقسيم واضح و من طريقه التصويت للمرشحين و طريقه تفكيرهم المحصورة بالحاضر و تجاهل واضح للحاضر و للمستقبل

نعم نذكر المرشح بخير وبحسن سيره وسلوكه و أعماله الخــيرة لكن ليس بالضرورة أن نمنحه صوتنا


حصلت لي قصه الاسبوع الماضي وهي بالفعل تعبر عن الواقع المرير لما يعيشه بعض شبابنا وهي باختصار

عندما نتناقش مع الربع حول أحد المرشحين و بالطبع أحد الحضور أخذه الحماس لما حصل وقالها بالكويتي الفصيح ترى أذيتنا بفلان شنو أهوا خالك و لا عمك

أكذب أعليكم ان قلت لكم ان هالقصه ما أثرت فيني بل أحسست بأن ما نعانيه من تناحر و من بلاوي في هالمجتمع هو أن اختيارنا لمرشحينا يجب أن يكون إما

شخص من العايلة
شخص من نفس المنطقة
شخص من نفس القبيلة
شخص من نفس الطبقة
شخص من نفس المذهب
شخص يوجبنا في كل المناسبات
شخص مايقصر ويا عيالنا بالخدمات



وما يعمله ربعنا من حملات سيذهب للأسف مع الريح وبيدش من هني و بيطلع من هني

و كأنك يابو زيد ماغزيت



نقطة جميلة على السطر

ما رأته عينيي هذا الصباح من صورة جميلة سهلت علي طريق الدوام وتناسيت الزحمة وعصبيتها


قرت عينا بشوفتك يا الغالي

34 comments:

nanonano said...

شنو أهوا خالك و لا عمك

أنا هالجمله تحرنــــــــي

و للأسف منتشره

يا أبو الدستور أنا ييني أحساس هاليومين

أن الوضع راح يكون هذا سيفوه و هذي خلاجينه

و بالفعل الصوره

كان لها أثر طيّب في نفوسنا اليوم الصبح

الدســتور said...

nanonano :

ننطر و نشوف

enter-q8 said...

انا راح احزن فعلا اذا لقيت الندوة اليوم عادية
و لما اقول احزن يعني الله يعين ام العيال على النفسية اللي راح تشوفها

شباب الجهرا متأثرين بحملات التبرع مالت الايام اللي طافت
مناصرة

Yang said...

مرة سألني واحد من الربع, هل راح تعطي فلان؟؟
قلت له: لا.

سألني: ليش؟؟ هو خلصلك المعاملة الفلانية.
رديت عليه: هل معناة هذا الكلام انه ملكني؟؟؟؟

هذي مظلومية وهو دافع عن الحق ويابلي حقي, بس مو معناتها إني مقتنع فيه كمرشح ويستاهل الصوت.

مو كل نائب أو مرشح يسوي معاملة أو يساعد نكون مجبرين ان نعطيه الصوت, هذا قناعة شخصية.


تحياتي

Bloggerista said...

هذا للأسف الواقع

أغلب الناس يقولون ما اقدر أصوت حق واحد ما اعرفه شخصيا

يعني موديل اللي تعرفه أحسن من اللي ما تعرفه

شنو الحل برايك؟

Mohammad Al-Yousifi said...

اتوقع لو الجوعان يرشح يفوز مصوقر

tabbebek said...

انا اول واح ارشح الجوعان يا ريت في الديرة 50 مرشح مثله

ZwaiZ said...

najim el-blogat el-yoom esara7a mara7 amil men shoufat sourta o kel mashiftHa tethakart videoat dowaween lathnain .. abna`a state of jahra wayed 3onsiriyeen ;|

المتابع said...

بالفعل ان الناخبين فى وطننا يضحكون عليهم ببعض الخدمات او بعض الشعارات الواهيه الكاذبه ،وهناك من يعطى صوته مجامله لصديقه او احد الاشخاص الاقارب او انسان من طائفته او من قبيلته اوبسبب انه خدمه فى مصالح بسيطه ،نحن لانريد المرشح الوقتى او الاسرع نحن نريد المرشح الافضل والاكفأ والامثل ،لانريد مجاملات على حساب الوطن او الشعب .

هل كيف said...

عدل كلامك
تذكر أيام الدوائر الـ25
كان في هبة يقولون عندك صوتين واحد خدمات يضبط أمورك والثاني مواقف
ساعة لربك وساعة لألبك :p

أما عن الصورة صج زمن
إلا ما قلتلي منو كان ورا محاولة إغتياله؟

وعلى طاري الصورة عبدالرحمن العنجري
أمس طالع بمقابلة على الوطن!
الله يقومك بالعافية يا حمد الجوعان

الدســتور said...

Enter-Q8 :

الندوة مو اليوم يا الحبيب

:))

الدســتور said...

Yang :

هذا نعاني منه بكثرة في انتخابات 25
اما الحين خفت شوي
:)

الدســتور said...

Bloggerista :

انا عن نفسي
ما اعطي صوتي لشخص
الا وانا محلل شخصيته عدل
و بيني و بين نفسي
طبعا مع كم معلومة من هني وهناك
:))

الدســتور said...

ma6goog :

يستاهل
والله

الدســتور said...

د. عارف :

لو خليت خربت

و الناس الطيبة وايد

الدســتور said...

ZwaiZ :

انا اشهد انه نجم البلوقات

الدســتور said...

المتابع :

صح لسانك

الدســتور said...

هل كيف :

منو ورى اغتياله

هل كيف ماتعرف
:))

بس said...

الله كريم يفرجها على هالديرة


يا صباح الخير

الدســتور said...

بس :

صباح النوووور

Ahmad said...

للاسف يا ابو الدستور الواحد صار يتكلم من غير منطق (خالك ولاعمك!!) .. صار تفكير الناس غلط في غلط اللي ايينا الديوانية ويتحيلق لنا نعطيه بغض النظر عن فكره ومبادئه أما اللي ما يمرنا (والله لو يحنقز ما نعطيه) حتى لو كان افلاطون

وهذا الفكر غلط .. يبيلنا وعي انتخابي يا ابو الدستور لكن اتفهم منو ولا منو الناس تغلبها العاطفه والمجامله ..

Ahmad said...

لابعد اضيف على كلامي ان اذا سالت ياجماعه هذا ليش مو عاجبكم يقولون لك والله عود لي متى .. والله توه صغير ياهل .. والله شكله مو شكل عضو .. والله مادري مو مرتاحله واذا واحد بيناقشك يعني فاهم يقول والله ماسوى شي بالمجلس .. شنو سوى شنو سوى (مافي منطق ولافي حجه ولا يدرون يون الله قاطهم ولا تابعوا الجلسات ولا قروا الجرايد ولا ولا ولا)

الدســتور said...

Ahmad :

و منو اللي يقوم بالوعي
اذا على الصحف
ف انت شايف
و اذا الاعلام
هم انت شايف

و اذا الحكومة
هم انت شايف

الدســتور said...

Ahmad :

ماسوى شي
انا سمعتها وايد

كلمة و الربع يرددونها

Blog 3amty said...

بويه نبيك ، الوضع مومضبوط بس أكيد في أمل !

ساره النومس said...

أهم شي الصوت الجهراوي ...


والله ياخوك تعبنا من الشعارات الغير كافية ..

شكثر شعارات في خدمة الوطن والمصلحجييين زادوا والله ..

قبل شوي بديوانيتنا يايين مرشحين قلت لأبوي بقعد وياك اناقشهم ... جان يقول لا لوووول ويبيهم يتقهوون ويروحون ... مامنهم فود والله

أهل شرق said...

لو في قانون يطبق وفي تنمية وفي تطوير وتعليم متطور وحكومة تعامل هالشعب باحترام

جان ماسعت كل هالخرابيط (اسمحلي) من التبرعات البايخة هدفها شخصي بحت ومالهم شغل بالمصلحة العامة

الدســتور said...

Blog 3amty :

اي انشاءالله

الدســتور said...

طموحة مملوحة :

بتقعدين بديوانيتكم

هههههههههه

ياكـــــبرها

الدســتور said...

أهل شرق :

للاسف
شغل استرزاق بعضهم

كويــتي لايــعه كبــده said...

الجهراء للكويت
مثل
كوابيك لكندا


وعقلية التصويت بالكويت فعلا مصيبة
الديمقراطية تعتمد بالدرجة الأولى على متوسط وعي المجتمع السياسي ونحن دون هذا المستوى وقبل ان يفرح البعض بتعليقي انه ضد الديمقراطي فهو بالعكس فلا يوجد بديل لنظام الحكم بالكويت ولم يكن منحة حتى يسحب

الدســتور said...

كويــتي لايــعه كبــده:

صح لسانك

~ تيمــاء said...

للأسف غالبية الشعب ما وصل لمرحلة النضج السياسي الغالبية متخبط باختياراته

و ولا نناقش شخص على سلبيات نائب سابق و يقول هذا اختيار القبيلة و احنا ملزومين نصوت له


أتعب على عقلية الناخب الواعي



==


ربي يحفظ الجوعان و يكثر من أمثاله رجـل و الرجال قليل ..

الدســتور said...

~ تيمــاء :

كلنا تخبطنا ولازلنا بمرحلة النضج
لكن المشكلة باللي يصوت ويعرف ان صوته راح للي مايستاهله